वर्धा – अखिल भारतीय अंधश्रद्धा निर्मूलन समितीच्या जिल्हा व तालुका शाखेद्वारे गुरूवार, दि. १३ रोजी एकोणतिसावा लोकजागर स्मशान होलिकोत्सव आयोजित करण्यात आला असून लोकसंस्कृतीचे अभ्यासक प्रा. डॉ. अशोक राणा यांचे ‘भूतभाषा आणि देवभाषा’ या विषयावर सायंकाळी ७ वाजता व्याख्यान आयोजित करण्यात आले आहे.
दरवर्षीप्रमाणे स्थानिक स्मशानभूमीत होळीपौर्णिमेला हा लोकजागर कार्यक्रम आयोजित असून यावर्षी भाषा, साहित्य, संस्कृती, इतिहासाचे अभ्यासक, संशोधक, चिकित्सक लेखक तथा बुद्धिप्रामाण्यवादी वक्ते डॉ. अशोक राणा वर्धेकरांशी संवाद साधतील. अशोक राणा यांची संशोधनात्मक व प्रबोधनपर ७६ पुस्तके प्रकाशित झाली असून ते यंदाच्या १९व्या विद्रोही मराठी साहित्य संमेलनाचे अध्यक्ष राहिले आहेत.
समाजमनातून भूतप्रेतांची अवास्तव भीती आणि स्मशानाबाबतचा नकारात्मक दृष्टिकोन दूर सारण्यासाठी अठ्ठावीस वर्षांपूर्वी अ.भा. अंनिसद्वारे वर्ध्यात लोकजागर होलिकोत्सव सुरू करण्यात आला. प्रबोधन आणि मनोरंजन यांची सांगड घालणाऱ्या या उपक्रमात आजतागायत गझलनवाज भीमराव पांचाळे, महात्मा गांधी यांचे पणतू तुषार गांधी, कवी ज्ञानेश वाकुडकर, अभिनेते किशोर बळी, गझलकार नितीन देशमुख, लेखक श्याम पेठकर, सिनेदिग्दर्शक हरीश इथापे, सनदी अधिकारी ई.झेड. खोब्रागडे, राजेश खवले, अंनिसची मुलुखमैदान तोफ ॲड. गणेश हलकारे, दिलीप सोळंके, अविनाश दुधे, मानसोपचारतज्ज्ञ डॉ. प्रदीप पाटील, प्रा. राजा आकाश, भाऊसाहेब थुटे, जीवन चोरे, नकलाकार विद्याराज कोरे, प्रा. शेख हाशम अशा अनेक मान्यवरांनी विचारांची मांडणी व कला सादरीकरण केले आहे. जादूच्या प्रयोगांमागील विज्ञान समजावून सांगण्यासाठी ‘जादुई नगरी’ ही विदर्भस्तरीय जादूगारांची स्पर्धा, पेटत्या निखाऱ्यांवरून चालण्यापासून तर विविध प्रकारच्या चमत्कारांमागचे रहस्य उलगडणारे वैज्ञानिक प्रयोग, लोकजागर गीतमैफल, कविसंमेलन, कथाकथन, प्रबोधनात्मक पथनाट्ये, एकपात्री प्रयोग या सादरीकरणासोबतच पुस्तक प्रकाशन व ध्वनिमुद्रिकांचे विमोचन, देहदान करणाऱ्यांचा सत्कार, चळवळीतील सदस्यांचे वाढदिवस, असे अनेक सोहळे स्मशानभूमीवर होलिकोत्सवात साजरे झाले आहेत.
सुजाण नागरिकांनी, युवकयुवतींनी मित्रपरिवारासह या कार्यक्रमात सहभागी होण्याचे आवाहन अ.भा. अंनिसचे राष्ट्रीय कार्यकारिणी सदस्य संजय इंगळे तिगावकर, युवा शाखेचे राज्य संघटक पंकज वंजारे, जिल्हाध्यक्ष हरीश इथापे, महिला शाखेच्या जिल्हा संघटक डॉ. सुचिता ठाकरे, जिल्हा सचिव निलेश गुल्हाने, कार्याध्यक्ष प्रा. विद्या राईकवार, उपाध्यक्ष दादाराव मून, डॉ. धनंजय सोनटक्के, कोषाध्यक्ष संगीता इंगळे, सहसंघटक प्रशांत नेपटे, आकाश जयस्वाल, सहसचिव अजय इंगोले, डॉ. सीमा पुसदकर, प्रा. किशोर वानखडे, मुरलीधर बेलखोडे, सुरेश राहाटे, ॲड. के.पी. लोहवे, किरण पटेवार, मनीष जगताप, तालुकाध्यक्ष प्रा. एकनाथ मुरकुटे, रवी पुनसे, डॉ. चंदू पोपटकर, युवा शाखेचे सचिव सतीश इंगोले, सहसंघटक तेजस्विनी क्षीरसागर यांच्यासह सर्व जिल्हा व तालुका कार्यकारिणी सदस्यांनी केले आहे.
आज अंनिसचा लोकजागर स्मशान होलिकोत्सव *डाॅ. अशोक राणा यांचा ‘भूतभाषा व देवभाषा’ यावर संवाद*
